نیب نے بلاول زرداری کو طلب کر لیا

راولپنڈی(مانیٹرنگ ڈیسک)قومی احتساب بیورو (نیب) راولپنڈی نے پاکستان پیپلزپارٹی کے چیئرمین بلاول زرداری کو 24 دسمبر کو طلب کر لیا۔ذرائع کے مطابق بلاول کو جعلی اکاؤنٹس کیس میں طلب کیا گیا ہے اور انہیں بطور ڈائریکٹر زرداری گروپ بلایا گیا ہے۔ ذرائع نے بتایا کہ بلاول زرداری کو جے وی اوپل کمپنی میں ایک ارب سے زائد کی رقم کی مبینہ منتقلی پر طلب کیا گیا۔خیال رہے کہ نیب اس  سے قبل بھی پی پی چیئرمین کو طلب کرچکا ہے اور وہ متعدد بار پیش ہوچکے ہیں۔نیب طلبی کے حوالے سے پیپلزپارٹی کے چیئرمین بلاول زرداری کے ترجمان سینیٹر مصطفیٰ نواز کھوکھر کا ردعمل میں کہنا تھا کہ بلاول کو نیب کا نوٹس موصول ہوگیا ہے اور نیب کا بلاول کو نوٹس بھیجنا ہراساں کرنے کے مترادف ہے۔ترجمان کے مطابق چیف جسٹس بھری عدالت میں کہہ چکے کہ بلاول بے قصور ہیں لیکن مخالفین کو نیب کے ذریعے سیاسی انتقام کا نشانہ بنایا جاتا ہے، جب بھی حکومت بحران کا شکار ہوتی ہے تو مخالفین کو انتقام کا نشانہ بنایا جاتا ہے۔انہوں نے کہا کہ نیب بتائے کہ اس نے حکومتی ارکان و وزراء کو کتنے نوٹسز دیے؟ نیب بتائے حکومتی اراکین اور وزراء کے خلاف کرپشن کیسز کیوں زیرالتواء ہیں؟یاد رہے کہ قومی احتساب بیورو (نیب) نے جعلی اکاؤنٹس پارک لین پیراتھنن کیس میں چیرمین پیپلزپارٹی بلاول بھٹو زرداری کو کلیئر قرار دیا تھا۔
بلاول نیب طلب