لاڑکانہ ، بیوپاری سے لوٹ مار،مزاحمت پر فائرنگ سے زخمی کردیا

لاڑکانہ(نمائندہ جسارت) لاڑکانہ کے قریب وگن روڈ ہائی وے پر مسلح افراد نے دن دہاڑے بیوپاری سے لوٹ مار کرنے کی کوشش کی دوران مزاحمت مسلح افراد نے فائرنگ کرکے بیوپاری منظور علی وکو کو زخمی کردیا، اطلاع پر حد کے تھانہ کی پولیس نے پہنچ کر زخمی کو علاج کے لیے چانڈکا اسپتال منتقل کیا جبکہ واقعے کے بعد ملزمان فرار ہونے میں کامیاب ہوگئے۔ اس موقع پر زخمی کے چچا زاد بھائی شمن وکو نے بتایا کہ مسلح افراد نے بیوپاری سے 2 لاکھ چالیس ہزار نقدی بھی لوٹ کر فرار ہوگئے جن سے مزاحمت کرنے پر مسلح افراد نے میرے چچا زاد بھائی منظور علی وکو کو فائرنگ کرکے زخمی کردیا ہے۔ پولیس کے مطابق فرار ہونے والے ملزمان کی تلاش جاری ہے جنہیں جلد گرفتار کیا جائے گا۔ دوسری جانب آخری اطلاع موصول ہونے تک واقعے کا مقدمہ درج نہ ہوسکا اور نہ کوئی گرفتاری عمل میں آسکی۔ لاڑکانہ شہر اور گردو نواح میں دو مختلف روڈ حادثے میں تین نوجوان سمیت چار افراد زخمی ہوئے جنہیں اسپتال منتقل کیا گیا جہاں ایک زخمی نوجوان کی حالت تشویش ناک بتائی جاتی ہے۔گزشتہ روز لاڑکانہ شہر کے اوور ہیڈ برج پر دو موٹر سائیکلوں میں آمنے سامنے ٹکر کے نتیجے میں شہر کے اللہ آباد کا رہائشی نوجوان علی اصغر ڈیتھو، خالق کالونی کا رہائشی مدثر شاہ اور مدینہ کالونی کا رہائشی نوجوان شرجیل کھاوڑ شدید زخمی ہوئے، لاڑکانہ کے قریب رتودیرو روڈ پر تیز رفتار کار کی ٹکر سے 50 سالہ ضعیف شخص کنگا کا رہائشی محب علی مغیری شدید زخمی ہوئے، تینوں نوجوان کو قریبی لوگوں جبکہ ضعیف زخمی شخص کو کار ڈرائیور نے چانڈکا اسپتال کے شعبہ حادثات منتقل کیا جہاں ایک نوجوان کی حالت تشویش ناک بتائی جاتی ہے۔