لاڑکانہ(نمائندہ جسارت) سندھ کے دیگر شہروں میں فصلوں کو تباہ کرنے والی ٹڈی دل لاڑکانہ پہنچ گئیں جس سے شہریوں سمیت آبادگارپریشانی میں مبتلا ہوگئے ۔ سندھ کے کئی شہروں میں فصلوں کی تباہی پھیلانے والی ٹڈی دل نے لاڑکانہ شہر کے مختلف علاقوں میں گھروں سمیت باغات، درختوں پر ڈیرے جمالیے جس سے شہری خوف میں مبتلا ہو گئے ہیں۔ شہری اپنی مدد آپ کے تحت ٹڈی دل کو باغات سے اڑانے میں مصروف رہے ۔ ان کا کہنا تھا کہ ٹڈی دل سے دھان اور سبزیوں کی فصل کو نقصان پہنچ سکتا ہے۔ شہریوں نے مطالبہ کیا کہ ٹڈی دل کے خاتمے کیلیے سندھ حکومت مؤثر اقدامات کرے اور شہریوں سمیت کسانوں نے لاڑکانہ انتظامیہ سے بھی فوری طور پر اسپرے اور دوسرے اقدامات کرنے کا مطالبہ کیا ہے۔
