اسلام آباد (جسارت نیوز) ہالینڈ کی جونیئر ہاکی ٹیم آئندہ سال کے آغاز میں پاکستان کا دورہ کرے گی اور قومی جونیئر ٹیم کے ساتھ سیریز کھیلے گی۔ پاکستان ہاکی فیڈریشن کے صدر بریگیڈیئر (ر) خالد سجاد کھوکھر نے منگل کو سرکاری خبر رساں ادارے کو بتایا کہ اس حوالے سے ہالینڈ کے ساتھ بات چیت جاری ہے اور امید رکھتے ہیں کہ دونوں ممالک کے درمیان سیریز کو آئندہ سال حتمی شکل دی جائے گی۔ ایک سوال کے جواب میں انہوں نے کہا کہ ہالینڈ کی ٹیم کی جنوری 2020ء میں مصروف ہے جس کے بعد سیریز کو حتمی شکل دی جائے گی۔ انہوں نے کہا کہ پاکستان ہاکی فیڈریشن جرمنی اور ملائیشیا کے ساتھ بھی دورہ پاکستان کیلئے بات چیت کر رہی ہے لیکن اس حوالہ سے کسی چیز کو حتمی شکل نہیں دی گئی۔ انہوں نے کہا کہ پاکستان ہاکی فیڈریشن باصلاحیت کھلاڑیوں پر توجہ دے رہی ہے۔
