لاڑکانہ(نمائندہ جسارت) لاڑکانہ کے قریب مہر بائی پاس پر تیز رفتار کار اور موٹرسائیکل میں ٹکر کے نتیجے میں پیر شیر روڈ کے رہائشی 55 سالہ رحیم بخش کھوکھر اور اس کی بھابھی 50 سالہ کزبانو کھوکھر زخمی ہوگئے، اطلاع ملتے ہی حد کے تھانہ پیر شیر ایٹ عاقل کی پولیس نے پہنچ کر کار تحویل میں لی اور ڈرائیور کو گرفتار کرلیا۔ بعد ازاں زخمیوں کو علاج کے لیے چانڈکا اسپتال کے شعبہ حادثات منتقل کیا گیا جہاں دونوں زخمیوں کی حالت تشویشناک بتائی جاتی ہے۔ اس موقع پر زخمیوں کے لواحقین نے بتایا کہ رحیم بخش کھوکھر اپنی بیمار بھابھی کے علاج معالجے کے سلسلے میں لاڑکانہ آیا جہاں سے وہ گھر واپس آرہا تھا کہ مہر بائی پاس پر وہ حادثے کا شکار ہوئے ہیں۔دوسری جانب لاڑکانہ کے قریب اوٹھا چوک کے قریب تیز رفتار موٹرسائیکل اور ٹریکٹر میں ٹکر کے نتیجے میں لاڑکانہ شہر کے کرمان باغ کے رہائشی دو طالب علم معز شیخ اور اس کا دوست ظہیر شیخ زخمی ہوئے جنہیں قریب کے لوگوں نے زخمی حالت میں چانڈکا اسپتال کے شعبہ حادثات منتقل کیا جہاں انہیں طبی امداد دی گئی۔ اس موقع پر زخمی نوجوان کے دوست منصور شیخ نے بتایا کہ معز اور ظہیر نویں جماعت کے طالب علم ہیں جو اپنی موٹرسائیکل پر سوار ہوکر اوٹھا چوک گھومنے گئے جہاں ان کی موٹرسائیکل ٹریکٹر ٹرالی سے ٹکرگئی اور نتیجے میں زخمی ہوئے ہیں۔ ڈاکٹروں کے مطابق زخمی طلبہ کی حالت بہتر بتائی جارہی ہے۔
