لاڑکانہ (نمائندہ جسارت) میہڑ کے قریب گاؤں وسایو جانوری میں 32 سالہ نوجوان اللہ بچایو جانوری نے مبینہ طور پر تیز دھار آلے سے خود کا گلہ کاٹ کر خودکشی کی کوشش کی جسے ورثا نے زخمی حالت میں چانڈکا اسپتال کے شعبہ حادثات منتقل کیا جہاں انہیں طبی امداد دی گئی جبکہ ڈاکٹروں کے مطابق زخمی نوجوان کی حالت خطرے سے باہر بتائی جاتی ہے۔ ورثا کے مطابق اللہ بچایو کا ذہنی توازن ٹھیک نہیں، کبھی کبھی اچانک دورے پڑتے ہیں۔ شہدادکوٹ کے قریب گولو واہ روڈ پر تیز رفتار کار اور موٹرسائیکل میں ٹکر کے نتیجے میں شہدادکوٹ کے نواحی گاؤں فیصل خان بروہی سے تعلق رکھنے والے 19 سالہ نوجوان عبدالجبار بروہی اور اس کی والدہ صفوران بروہی شدید زخمی ہوئے بعد ازاں کار ڈرائیور نے دونوں زخمیوں کو علاج کے لیے چانڈکا اسپتال کے شعبہ حادثات منتقل کیا جہاں انہیں طبی امداد دی گئی۔ زخمیوں کے مطابق وہ لاڑکانہ شہر کسی کام کے سلسلے میں آئے جہاں واپس گاؤں جانے کے دوران گولو واہ کے قریب تیز رفتار کار اور موٹرسائیکل میں ٹکر کے نتیجے میں وہ زخمی ہوئے ہیں۔
