نوابشاہ (ڈسٹرکٹ رپورٹر) ڈسڑکٹ جیل کا ٹرانسفارمر تین دن سے خراب، شدید گرمی، حبس اور بجلی بند ہونے کے باعث چار قیدی بے ہوش، متعدد کی طبیعت خراب، سو قیدیوں کے گنجائش ہے، تین سو سے زائد قیدیوں کو رکھا گیا ہے۔ نئے ٹرانسفارمر کے لیے آئی جی سندھ کو خط لکھ دیا ہے، ڈسڑکٹ جیلر کا موقف۔ اس سلسلے میں ڈسڑکٹ جیلر سید علی اکبر شاہ نے بتایا کہ ڈسڑکٹ جیل کے لیے پچاس کے وی کا ٹرانسفارمر خراب ہوگیا، جسے ٹھیک کروایا گیا مگر لوڈ کے باعث پھر خراب ہوگیا، جس کے بعد آئی جی سندھ کو سو کے وی ٹرانسفارمر کی درخواست دی گئی۔ انہوں نے بتایا کہ ٹرانسفارمر خراب ہونے سے ڈسڑکٹ جیل کی بجلی بند ہے، ضرورت کے مطابق جنریٹروں سے بجلی چلائی جاتی ہے مگر اتنا بجٹ نہیں کہ مسلسل جنریٹر چلائے جاسکیں۔ ڈسڑکٹ جیلر سید علی اکبر شاہ نے بتایا کہ جیل میں سو قیدیوں کی گنجائش ہے مگر تین سو سے زائد قیدیوں کو رکھا گیا ہے، بجلی کی بندش اور شدید گرمی کے باعث متعدد قیدیوں کی طبیعت خراب ہے، جبکہ چار قیدی بے ہوش ہوئے جنہیں طبی امداد دی گئی۔
