کراچی (اسٹاف رپورٹر)سابق اسکواش کھلاڑی جان شیر خان نے کہا ہے کہ سکواش کے کھیل کی بحالی کیلئے پشاور میں افتتاحی ایڈیشن چیف سیکرٹری نیشنل ا سکواش ٹورنامنٹ کا انعقاد کیا جائے گا، یہ سالانہ ایونٹ ہو گا، ہم پرامید ہیں کہ اس ایونٹ سے نیا ٹیلنٹ سامنے آئے جو عالمی سطح پر اپنے ملک کا نام روشن کر سکے گا۔ گزشتہ روز سرکاری خبر رساں ادارے سے گفتگو کرتے ہوئے جان شیر خان نے کہا کہ انہوں نے اس سلسلے میں چیف سیکرٹری خیبرپختونخوا محمد سلیم خان سے ملاقات بھی کی۔ انہوں نے کہا کہ وہ پاکستان میں ا سکواش کو آگے دیکھنا چاہتے ہیں۔ انہوں نے کہا کہ ہم اپنے نوجوان کھلاڑیوں کی صلاحیتوں کو نکھارنے کیلئے زیادہ سے زیادہ ایونٹ کا انعقاد کریں گے۔ انہوں نے کہا کہ میں نے چیف سیکرٹری خیبرپختونخوا محمد سلیم خان کو چیف سیکرٹری نیشنل اسکواش ٹورنامنٹ کے انعقاد کا مشورہ دیا ہے۔ انہوں نے کہا کہ چیف سیکرٹری 2ہفتے تک ان کی تجویز کو آگے بھجوائیں گے۔ جان شیر خان نے چیف سیکرٹری کی جانب سے تعاون کی تعریف کی۔ واضح رہے کہ جان شیر خان نے ورلڈ اوپن 8 مرتبہ اور برٹش اوپن 6 مرتبہ جیتی۔
