میرپور ماتھیلو (نمائندہ جسارت ) سندھ حکومت کے محکمہ اسپورٹس کے زیر اہتمام تین روزہ گھوٹکی اسپورٹس فیسٹول کا سندھ کے صوبائی وزیر اسپورٹس سردار محمد بخش مہر اور سیکریٹری کھیل عبدالعلیم لاشاری نے کردیا. افتتاحی تقریب سے سردار محمد بخش مہر نے خطاب کرتے ہوئے کہنا تھا کہ ہم کہتے ہیں کہ پی سی بی نے اپنا نظام درست نہ کیا تو ہم اپنا الگ کرکٹ بورڈ بنانے پر مجبور ہونگے، سندھ میں اچھے کرکٹر ہیں، اور سندھ میں ٹیلنٹ کی کوئی کمی نہیں ہے، ہم نظام کو درست کرنے کی کوشش کریں گے، پی سی بی کو سندھ کے کرکٹرز کیساتھ اپنا رویہ تبدیل کرنا ہوگا، ہمیں حقوق نہ ملے تو الگ کرکٹ بورڈ بنائیں گے. سردار محمد بخش مہر کا مزید کہنا تھا کہ کوشش ہے کہ ضلع گھوٹکی میں پی ایس ایل کے میچز بھی ہوں، سندھ کی خواتین کھیلوں میں سب سے آگے ہیں، اسپورٹس کامپلیکس گھوٹکی میں ہم سوئمنگ پول بھی بنائیں گے اور گراؤنڈ میں فرنٹ لائٹس بھی لگوائیں گے،مقابلوں کا یہ سلسلہ جاری رہے گا، یہاں ہم نے آئی بی اے کیمپس بھی دیا ہے، جبکہ تعلیم سمیت کھیلوں کی سرگرمیوں پر توجہ دے رہے ہیں. وزیر کھیل کا کہنا تھا کہ سندھ حکومت نے گھوٹکی سے اوباوڑو تک کھیلوں کے گراؤنڈز بنائے ہیں، ہماری کوشش ہے کہ سندھ کی خواتین کو کھیلوں کے پروگرامز، سہولیات، اور وظائف کے لئے مخصوص فنڈز مختص کریں، سندھ حکومت شہری علاقوں جے ساتھ ساتھ دیہی علاقوں میں بھی کھیلوں کے بنیادی ڈھانچہ کو بہتر بناںے کی طرف توجہ دے رہی ہے. سردار محمد بخش مہر کا کہنا تھا کہ گرلز و بوائز میں ہاکی، کرکٹ، فٹسال، ملاکھڑہ، تائیکواڈو، کوڈی کوڈی، تھرو بال اور دیگر کھیلوں کے مقابلے کرائے جارہے ہیں، یہ ایونٹ ضلع گھوٹکی کے کھلاڑیوں کے ٹیلنٹ کو پروموٹ کرنے کے لئے منعقد کئے گئے ہیں. اس سے پہلے گھوٹکی اسپورٹس فیسٹول 24 فروری تک جاری رہیگا جس میں مختلف کھیلوں کے مقابلے ہونگے. گھوٹکی اسپورٹس فیسٹول میں 2 ہزار سے زائد گرلز و بوائز کھلاڑی حصہ لے رہے ہیں۔ شاندار افتتاحی تقریب کے موقع پر گھوٹکی اسپورٹس کامپلیکس ہزاروں پر جوش کھیلوں کے شائقین سے بھرا ہوا تھا. تقریب میں ڈائریکٹر اسپورٹس سندھ امداد علی ابڑو، ڈپٹی کمشنر گھوٹکی، چیف انجنیئر اسلم مہر، ڈپٹی ڈائریکٹر میر محمد کلہوڑو سمیت تمام ڈسٹرکٹ اسپورٹس افسران بھی موجود تھے۔
