کراچی (کامرس رپورٹر) کراچی الیکٹرانکس ڈیلرز ایسوسی ایشن (کیڈا) کے صدر رضوان عرفان، چیئرمین ریگل ایریا سفیر بٹ، اور چیئرمین عبداللہ ہارون روڈ فاروق اے بی نے ایڈیشنل ڈائریکٹر جنرل ایف آئی اے ساؤتھ مجاہد اکبر سے اہم ملاقات کی۔ملاقات میں حالیہ دنوں مارکیٹ میں ہونے والی چھاپہ مار کارروائیوں، دوکانداروں کو ہراساں کرنے، اور تاجروں کو درپیش دیگر مسائل پر تفصیلی گفتگو کی گئی۔ وفد نے اس بات پر زور دیا کہ اداروں کو تاجروں کے ساتھ تعاون کرنا چاہیے تاکہ کاروباری سرگرمیاں متاثر نہ ہوں۔ایڈیشنل ڈائریکٹر جنرل ایف آئی اے مجاہد اکبر نے تاجروں کے مسائل غور سے سنے اور فوری طور پر ان کے حل کی یقین دہانی کروائی۔ مزید برآں، انہوں نے کراچی الیکٹرانکس ڈیلرز ایسوسی ایشن کے صدر رضوان عرفان کو ایک فوکل پرسن مقرر کرنے کی بھی یقین دہانی کرائی، تاکہ مستقبل میں تاجروں کے مسائل کو بروقت حل کیا جا سکے۔تاجروں نے ایف آئی اے کی جانب سے مثبت ردعمل کو خوش آئند قرار دیتے ہوئے امید ظاہر کی کہ اس فیصلے سے مارکیٹ میں کاروباری ماحول بہتر ہوگا اور اداروں اور تاجروں کے درمیان روابط مزید مضبوط ہوں گے۔
