کراچی(کامرس رپورٹر)یونائیٹڈ بزنس گروپ (یو بی جی) نے پاکستان کے فارما سیکٹر کی صلاحیت کو اجاگر کرنے کی ضرورت پر زور دیا ہے، جو ملک کی برآمدات میں نمایاں حصہ ڈالنے کی صلاحیت رکھتا ہے۔یو بی جی کے صدر زبیر طفیل اوردیگر رہنماؤں خالد تواب، حنیف گوہر اور سید مظہر علی ناصر کے مطابق پاکستان کا فارما سیکٹر چند سالوں میں 5 بلین ڈالر کے برآمدی ہدف کو حاصل کر سکتا ہے، جس سے ملک کی عالمی سطح پر تصویر تبدیل ہو جائے گی، اس مقصد کے حصول کے لیے حکومت کو فارما سیکٹر کو مراعات فراہم کرنی چاہئیں، کاروبار کرنے میں آسانی پیدا کرنی چاہیے، اور برآمدات کو بڑھانے کے لیے ٹیرف کی منصفانہ ترتیب، تجارتی سرمایہ کاری اور ادارہ جاتی اصلاحات پر توجہ دینی چاہیے۔یو بی جی رہنماؤں نے بتایا کہ فارما سیکٹر کی قیمت 2023 -24 میں 3.29 بلین ڈالر تک پہنچنے کا اندازہ ہے، جبکہ کل برآمدات 341 ملین ڈالر ہیں۔ یہ سیکٹر پاکستان کے جی ڈی پی میں 1فیصد سے زیادہ حصہ ڈالتا ہے اور امپورٹ سبسٹیوشن کے ذریعے سالانہ تقریباً 2 بلین ڈالر کی بچت کرتا ہے۔
