پیرس (انٹرنیشنل ڈیسک) فرانس کے وزیرِ تعلیم نے کہا ہے کہ ملک میں پرتشدد حملوں کا مقابلہ کرنے کے لیے اسکولوں کے اردگرد پولیس تعینات کی جائے گی جو وقتاً فوقتاً اسکول بیگوں میں چھپائے گئے چاقو اور دیگر ہتھیاروں کے لیے تلاشی شروع کرے گی۔ وزیرِ تعلیم ایلزبتھ بورن نے بتایا کہ ہم پراسیکیوٹر اور تعلیمی نظام کے نمائندے کے ساتھ مل کر اسکولوں کے داخلی راستوں پر بیگ کی باقاعدہ تلاشی کا انتظام کریں گے۔یہ کام پولیس کرے گی کیونکہ اساتذہ اور اسکول کا عملہ طلبہ کی تلاشی لینے کا مجاز نہیں ہے۔ نئی پالیسی اس وجہ سے نافذ کی گئی ہے کیونکہ چاقو کے حملے زیادہ عام ہو گئے ہیں۔ وزیر نے کہا کہ وہ قوانین میں تبدیلی کی بھی کوشش کریں گی جس کے تحت اسکول میں کسی طالب علم کو تیز دھار آلہ برآمد ہونے کی صورت میں انضباطی کونسل کے سامنے پیش ہونا پڑے گا۔ اس طرح کے کسی بھی معاملے کی استغاثہ کو بھی اطلاع پہنچ جائے گی۔ فی الحال ایسا طریقہ کار اسکولوں کے سربراہان کی صوابدید پر منحصر ہے۔ یاد رہے کہ رواں ماہ کے آغاز میں پیرس کے جنوب مغربی مضافاتی علاقے میں ہائی سکول کا ایک 17 سالہ طالب علم چاقو کے وار سے شدید زخمی ہو گیا تھا۔ دارالحکومت کے شمال میں واقع سین سینٹ ڈینس میں جرائم کی شرح میں تیزی سے اضافہ بھی دیکھنے میں آیا ہے۔
