کراچی (اسٹاف رپورٹر) شہر قائد میں ڈمپر، ٹرک، ٹرالر اور واٹر ٹینکروں کے باعث ہونے والے ٹریفک حادثات کی روک تھام کے لیے حفاظتی تدابیر متعارف کرادی گئی ہیں۔ شہر کے تمام ہیوی گاڑیوں پر آئندہ چند روز میں ایمرجنسی نمبرز آویزاں کیے جائیں گے، جن پر گاڑی کے مالکان اور ڈمپر ایسوسی ایشن کے عہدیداروں کے رابطے دستیاب ہوں گے۔ ڈمپر ایسوسی ایشن کے رہنما خانوادہ خان کے مطابق ان نمبروں کا مقصد یہ ہے کہ شہری کسی بھی غلط ڈرائیونگ یا ٹریفک قوانین کی خلاف ورزی کی شکایت براہ راست ان نمبروں پر کرسکیں۔ خانوادہ خان نے کہا کہ شکایات کے بعد متعلقہ ڈرائیوروں کے خلاف سخت اقدامات کیے جائیں گے اور ان کے لائسنس منسوخ کیے جائیں گے۔ انہوں نے کہا کہ اس اقدام کا مقصد شہریوں کو تحفظ فراہم کرنا اور ٹریفک حادثات کی شرح کو کم کرنا ہے۔ یہ فیصلہ وزیر اور ڈی آئی جی ٹریفک کی میٹنگ میں کیا گیا۔مزید برآں، ڈمپر ایسوسی ایشن نے یہ بھی اعلان کیا کہ تمام ہیوی گاڑیاں کراچی میں اب رات10 بجے سے صبح6 بجے تک چلائی جائیں گی تاکہ دن کے اوقات میں ہونے والے حادثات میں کمی کی جا سکے۔
