پاکستان کرکٹ ٹیم کے کپتان محمد رضوان نے کہا ہے کہ ٹیم کے 15 کے 15 کھلاڑی کپتان ہیں، امید ہے کہ پاکستان کرکٹ ٹیم چیمپینز ٹرافی 2017 والی تاریخ دہرائے گی۔
کراچی میں پریس کانفرنس کرتے ہوئے پاکستان کرکٹ ٹیم کے کپتان محمد رضوان نے کہا کہ ہماری صلاحیت پر شک نہیں ہونا چاہیے، ٹیم سے توقعات رکھنی چاہئیں، ہمارے پاس اچھے کھلاڑی ہیں۔
انہوں نے کہا کہ پوری قوم چیمپئنز ٹرافی کو انجوائے کرے، جو کمزوریاں تھیں ان پرکام کیا ہے، خوشی ہوتی ہے جب ٹیم کی مشترکہ کوشش سے میچ میں کامیاب ہو۔
ان کا کہنا تھا کہ چیمپئنز ٹرافی میں بابراعظم سے بہت زیادہ توقعات ہیں، جو کمی ہے وہ بھی دور ہو جائے گی، ہماری محنت زیادہ ہوگی تو اللہ ضرور کامیاب کرے گا۔
محمد رضوان نے مزید کہا کہ ہم سینئر پلیئر ہیں ہماری ذمے داری زیادہ بنتی ہے ،کوشش یہی کریں گے کل کے میچ میں کمزوریاں نہ ہوں، ہم اپنی بہترین پرفارمنس دینے کی کوشش کر رہے ہیں۔
قومی ٹیم کے کپتان نے کہا کہ فاسٹ بولر حارث رؤف مکمل فٹ ہے اور وہ ردھم میں بولنگ کررہے ہیں، حارث رؤف انشاللہ کل کا میچ کھیلے گا، نیوزی لینڈ کیخلاف بابراعظم ہی اوپنگ کریں گے، کھلاڑی کے سیکھنے کا عمل جاری رہتا ہے۔
انہوں نے کہا کہ چیمپئنز ٹرافی کی میزبانی ملنا خوشی کی بات ہے، 29 سال بعد پاکستان آئی سی سی ایونٹ کی میزبانی کر رہا ہے،امید ہے آئی سی سی ہمیں مزید ایونٹ کی میزبانی بھی دے گا۔
