غزہ: حماس نے اسرائیل پر جنگ بندی معاہدے کی خلاف ورزیوں کا الزام عائد کرتے ہوئے 15 فروری 2025 کو اسرائیلی یرغمالیوں کی رہائی غیر معینہ مدت تک ملتوی کرنے کا اعلان کیا ہے۔
غیر ملکی میڈیا رپورٹس کے مطابق فلسطینی مزاحمتی تنظیم حماس کے عسکری ونگ القسام بریگیڈز کے ترجمان ابو عبیدہ نے کہا کہ گزشتہ تین ہفتوں کے دوران اسرائیل کی جانب سے جنگ بندی معاہدے کی متعدد خلاف ورزیاں نوٹ کی گئی ہیں، جن میں بے گھر فلسطینیوں کی شمالی غزہ واپسی میں تاخیر اور مسلسل بمباری شامل ہے۔
ابو عبیدہ نے مزید کہا کہ غزہ کی پٹی کے متعدد علاقوں میں طے شدہ طریقے کے مطابق امداد بھی نہیں پہنچائی گئی ہے، جس کی وجہ سے 15 فروری 2025 کو اسرائیلی یرغمالیوں کی رہائی اگلے احکامات تک روک دی گئی ہے۔
انہوں نے واضح کیا کہ یہ رہائی اس وقت تک نہیں ہوگی جب تک اسرائیل معاہدے میں طے شدہ نکات پر عمل نہیں کرتا اور اس حوالے سے ہونے والے نقصان کی تلافی نہیں کرتا۔
ابو عبیدہ نے کہا کہ جب تک اسرائیل جنگ بندی معاہدے پر عمل کرتا رہے گا، تب تک حماس بھی معاہدے پر عمل درآمد کرے گی۔
واضح رہے کہ حماس نے اس سے قبل بھی اسرائیل کی جانب سے معاہدے کی پاسداری نہ کرنے کا الزام عائد کیا تھا، جس میں غزہ میں طے شدہ تعداد کے مطابق خیمے اور پہلے سے تیار گھر داخل نہ کرنے اور سڑکیں کھولنے اور ملبہ ہٹانے کے لیے بھاری مشینری غزہ میں داخل نہ کرنے کی شکایات شامل ہیں۔
