انٹرنیشنل فلسطین کانفرنس 15تا16فروری اسلام آباد میں ہوگی

اسلام آباد( نما ندہ جسارت ) ڈائریکٹر امور خارجہ جماعت اسلامی پاکستان آصف لقمان قاضی نے کہا ہے کہ اہل غزہ فلسطین کی مدد کے لیے 15،16 فروری کو اسلام آباد میں انٹر نیشنل فلسطین کانفرنس کا انعقاد ہو گا۔اس دو روزہ بین الاقوامی کانفرنس میں انٹر نیشنل، قومی، یوتھ، پرائم میڈیا اور ڈیجیٹل میڈیا سیشنزمنعقد ہوں گے۔آصف لقمان قاضی نے کہا انٹر نیشنل فلسطین کانفرنس کے پہلے روز کے سیشن کی صدارت اسپیکر قومی اسمبلی پاکستان ایاز صادق کریں گے جبکہ سیکرٹری جنرل جماعت اسلامی امیر العظیم،ڈاکٹر اشرف عواد،حافظ عزیر علی خان اظہار خیال کریں گے۔ نائب امیر جماعت اسلامی پاکستان لیاقت بلوچ کی صدارت میں پرائم میڈیا سیشن سے قومی و بین الاقوامی میڈیا پرسنز،سینئر تجزیہ کار،اینکر پرسنز اظہار خیال کریں گے جبکہ پہلے روز کانفرنس کے آخری بین الاقوامی سیشن کی صدارت ڈائریکٹر امور خارجہ جماعت اسلامی پاکستان آصف لقمان قاضی کریں گے جس میں ملایشیا،ایران،ساوتھ افریقا، ترکیہ، اردن،موریطانہ سے آئے ہوئے غیر ملکی مندو بین اظہار خیال کریں گے۔انٹر نیشنل فلسطین کانفرنس کے دوسرے روز بین الاقوامی سیشن کی صدارت آزاد جموں و کشمیر سابق صدر مسعود احمد خان کریں گے۔ امریکا، فلسطین، برطانیہ، شام، ڈومینیکا، غزہ، عراق سے آئے ہوئے غیر ملکی مندوبین اظہار خیال کریں گے۔ انٹر نیشنل فلسطین کانفرنس کے قومی سیشن کی صدارت امیر جماعت اسلامی پاکستان حافظ نعیم الرحمن کریں گے۔سیکرٹری جنرل جماعت اسلامی پاکستان امیر العظیم،سینیٹر مشاہد حسین سید، سینیٹر علی ظفر، سابق سینیٹر رضا ربانی، راجہ عباس ناصر جعفری،جاوید جبار جبکہ ڈیجیٹل میڈیا کے سیشن سے شعیب ہاشمی ودیگر خطاب کریں گے۔
فلسطین کانفرنس