معاشی بہتری اور مہنگائی میں کمی اچھے اشارے ہیں، نواز شریف

لاہور (نمائندہ جسارت) صدر مسلم لیگ(ن) نواز شریف نے کہا ہے کہ معاشی بہتری اور مہنگائی میں کمی ملک و قوم کیلیے اچھے اشارے ہیں، 30 ہزار پر آنے والی سٹاک ایکسچینج آج ایک لاکھ 20 ہزار پوائنٹس کی حدوں کو چھو رہی ہے جو معاشی ترقی کے تسلسل کا ثبوت ہے۔ لاہور میں صدر ن لیگ اور وزیراعلیٰ پنجاب سے ارکان پنجاب اسمبلی نے ملاقات کی جس میں ملک کی مجموعی صورتحال، پنجاب میں جاری ترقیاتی عمل اور عوامی خدمت کے منصوبوں پر غور کیا گیا۔ اس موقع پر گفتگو کرتے ہوئے نواز شریف کا کہنا تھا کہ نیت ٹھیک ہو تو اللہ تعالیٰ کی مدد آتی ہے، عوام کی خدمت سب سے بڑی عبادت ہے اور اس کا صلہ اور انعام اللہ ہی دیتا ہے۔ وزیراعظم شہباز شریف بڑی محنت کر رہے ہیں اور اداروں و نظام کی اصلاح پر ٹھوس پیش رفت جاری ہے، اللہ کا شکر ہے پاکستان کا تنزلی کی طرف سفر رک گیا ہے۔