واشنگٹن: میٹا کی معروف میسیجنگ ایپلی کیشن واٹس ایپ نے انکشاف کیا ہے کہ اسرائیلی اسپائی ویئر کمپنی پیراگون سولوشنز نے درجنوں صارفین کے اکاؤنٹس ہیک کرنے کی کوشش کی۔
غیر ملکی میڈیا کے مطابق واٹس ایپ کے ایک سینئر عہدیدار نے بتایا کہ کمپنی نے ہیکنگ کی کوشش کے بعد پیراگون کو قانونی نوٹس جاری کرتے ہوئے سیز اینڈ ڈیسسٹ کا خط ارسال کیا ہے۔
واٹس ایپ کے عہدیدار نے مزید بتایا کہ تقریباً 90 صارفین کے اکاؤنٹس ہیک کرنے کی کوشش کی گئی تھی۔
واٹس ایپ کے عہدیدارنے یہ بتانے سے انکار کر دیا کہ کن افراد کو ہدف بنایا گیا تھا اور ان کا تعلیق کس ملک سے تھا البتہ انہوں نے یہ ضرور کہا کہ ہدف بننے والوں میں سول سوسائٹی اور میڈیا کے افراد شامل ہیں۔
انہوں نے کہا کہ قانون نافذ کرنے والے اداروں اور دیگر متعلقہ شراکت داروں کو اس سلسلے میں آگاہ کر دیا گیا ہے ، واٹس ایپ نے اس ہیکنگ کوشش کو ناکام بنا دیا اور کمپنی لوگوں کی نجی بات چیت کرنے کی صلاحیت کا تحفظ جاری رکھے گی۔
غیر ملکی میڈیا کے مطابق اس معاملے پر پیراگون نے کسی قسم کا تبصرہ کرنے سے گریز کیا ہے۔
