واشنگٹن : معروف امریکی کمپنی ٹیسلا اور اسپیس ایکس کے بانی سوشل میڈیا پلیٹ فارم ایکس کے مالک ایلون مسک کو فری اسپیچ کے فروغ کے باعث نوبل امن انعام کے لیے نامزد کر دیا گیا ہے۔
میڈیا رپورٹس کے مطابق ایلون مسک کی نامزدگی ناروے کے ایک قانون ساز کی جانب سے کی گئی، جنہوں نے ان کے آزادی اظہار کے اصولوں اور سوشل میڈیا پر کھلی بحث کی حمایت کو نامزدگی کی وجہ قرار دیا۔
واضح رہے ایلون مسک نے سوشل میڈیا پلیٹ فارم ایکس (سابقہ ٹوئٹر) کو 2022 میں خریدا تھا جہاں ان کے بقول سب کو اظہار رائے کی آزادی ہے۔
نوبل انعام کمیٹی کی جانب سے رواں سال کے آخر میں انعامات کے حتمی فاتحین کا اعلان کیا جائے گا ، جبکہ دوسری طرف ایلون مسک کی نامزدگی عالمی سطح پر ایک بڑی بحث کا موضوع بن گئی ہے۔ ایک طرف ایلون مسک کو فری اسپیچ پر امن کے نوبل انعام کے لیے نامزد کیا گیا ہے مگر دوسری طرف ان کے ناقدین کہتے ہیں کہ ایکس پر سنسرشپ موجود ہے اور فلسطینیوں کے حق میں اور اسرائیلی جنگی جرائم پر بات کرنے والوں کے اکاؤنٹس معطل کیے جا رہے ہیں۔
