کراچی(کامرس رپورٹر) ایچ بی ایل مائیکرو فنانس بینک (ایچ بی ایل ایم ایف بی) نے مایا عنایت اسماعیل کو ریمنڈ ایچ کوتوال کی جگہ بورڈ آف ڈائریکٹرز کی چیئرپرسن مقرر کرنے کا اعلان کیا ہے۔ مایا عنایت اسماعیل کور سٹریٹجک ٹیم کا حصہ تھیں جس نے ایچ بی ایل ایم ایف بی کی پیشرو تنظیم ایف ایم ایف بی قائم کی تھی، جو پاکستان کا پہلا مائیکرو فنانس بینک ہے، جس نے آغا خان کے پسماندہ کمیونٹیز کے لئے مالیاتی خدمات تک رسائی کو یقینی بنانے کے وڑن کو عملی جامہ پہنایا۔2016 سے ایچ بی ایل مائیکرو فنانس بینک کے بورڈ کی رکن اور ایف آئی ایس سی کمیٹی کی چیئر ہیں جو مالیاتی شمولیت کے لئے ان کے جذبے اور لگن کی عکاسی کرتی ہے۔ مایا عنایت اسماعیل مالیاتی شعبے میں 25 سال سے زائد کا تجربہ رکھتی ہیں، جس میں مالیاتی خدمات کے اداروں، سٹریٹجک شراکت داریوں کے انتظام اور نچلی سطح پر لوگوں کو فائدہ پہنچانے کے لئے حکمت عملی کی تشکیل پر مضبوط توجہ دی گئی ہے۔سبکدوش ہونے والے چیئرمین ریومنڈ ایچ کوتوال نے کہا کہ ایچ بی ایل مائیکرو فنانس بینک کے چیئرمین کی حیثیت سے خدمات انجام دینا اعزاز کی بات ہے، مجھے فخر ہے کہ ہم نے پاکستان بھر میں مالیاتی شمولیت کو آگے بڑھانے میں مل کر جو کچھ حاصل کیا ہے، مجھے یقین ہے کہ مایا عنایت اسماعیل کی تقرری بینک کے لئے جدت طرازی کے ایک نئے دور کا آغاز کرے گی، اور میں ان کی رہنمائی میں بینک کو پھلتا پھولتا دیکھنے کا منتظر ہوں۔
