کراچی ( اسپورٹس رپورٹر)گورنر سندھ کامران خان ٹیسوری نے کہا ہے کہ گورنر اینیشیٹیو کے تحت کھیل کی سرگرمیاں بھی جاری ہیں اس ضمن میں فٹبا ل کے فروغ کے لئے ہر ممکن تعاون فراہم کریں گے۔ ان خیالات کا اظہار انہوں نے نیا ناظم آباد جیم خانہ کی انڈر 17 فٹبال ٹیم اور کلب کے آفیشلز کے 17رکنی وفد سے گورنرہائوس میں ملاقات کے دوران کیا۔ وفد نے گورنر سندھ کو نیا ناظم آباد جیم خانہ کے اغراض و مقاصد سے آگاہ کیا۔وفد نے بتایا کہ نیا ناظم آباد جیم خانہ فٹبال ٹیم اومان دورہ پر جلد روانہ ہوگی۔ اومان میں مختلف کلبز سے میچز بھی کھیلیں گے۔انہوں نے مزید کہا کہ نیا ناظم آباد میں فٹبال، کرکٹ سمیت مختلف کھیلوں کی بھر پور سہولیات موجود ہیں۔ فٹبال کے فروغ کے لئے حکومت کا تعاون درکار ہے۔بعدازاں فٹبا ل ٹیم اور کلب آفیشلز نے گورنرہائوس میں بابائے قوم قائد اعظم محمد علی جناح ؒ کے تاریخی کمرہ، آئی ٹی مارکی ، امید کی گھنٹی اور راشن ڈرائیو کا دورہ کیا ۔ کلب کے آفیشلز اور کھلاڑیوں نے گورنراینیشیٹیو کے تحت جاری منصوبوں کو قابل ستائش قرار دیا ۔
