کراچی(کامرس رپورٹر)سیاسی عدم استحکام،توشہ خانہ کیس کے حوالے سے مختلف قیاس آرائیاں،غیر ملکی سرمایہ کاروں کی جانب سے گذشتہ 6ماہ سے مارکیٹ میں مسلسل سیلنگ پریشراور گذشتہ 4دن سے میوچل فنڈز کی جانب سے فروخت کے دباو سے اسٹاک مارکیٹ کاروباری اتار چڑھاو کے بعد جمعرات کومندی کا شکار ہوگئے اور ہنڈریڈ انڈیکس 600پوائنٹس گھٹ گیا جس کی وجہ سے مارکیٹ 1لاکھ14ہزار پوائنٹس کی نفسیاتی حد گنوا بیٹھی اور انڈیکس1لاکھ13ہزار800پوائنٹس کی پست سطح پر بند ہوا۔مندی سے سرمایہ کارون کو 108ارب روپے سے زاید کا خسارہ برداشت کرنا پڑا جبکہ 57.75فیصد حصص کی قیمتیں بھی گھٹ گئیں۔اسٹاک ماہرین کے مطابق 6ماہ سے غیر ملکی سرمایہ کار آف لوڈنگ کر رہے ہیں اورپاکستان سے منافع کا آوٹ فلو بھی ہو رہاہے۔میوچل فنڈزنیمارکیٹ کو سہارا دیا ہوا تھا اور پچھلے دو ماہ میں 58ارب روپے سے زاید کی پوزیشنز میوچل فنڈز کی جانب سے لی گئی مگر گذشتہ 3تا 4دن سے میوچل فنڈز اور بروکرز کی جانب سے فروخت کا دباو دیکھا جا رہا ہے جس کی وجہ سے مارکیٹ مثبت آغاز کے باوجود مندی پربند ہوئی۔جمعرات کو کے ایس ای 100انڈیکس658پوائنٹس کی کمی سے 1لاکھ13ہزار836پوائنٹس پر بند ہوا اسی طرح241پوائنٹس کی کمی سے کے ایس ای 30انڈیکس35ہزار762پوائنٹس ہو گیا ۔
