کراچی:چیئرمین پیپلز پارٹی بلاول بھٹو زرداری نے کہا ہے کہ سندھ میں بچوں کی شرح اموات پاکستان کے دیگر صوبوں کی نسبت کم ہے، لیکن تھر میں بچوں کی ہلاکتوں کو زیادہ اچھالا جاتا ہے۔
نجی ٹی وی کی رپورٹ کے مطابق کراچی کے سول اسپتال میں ایک تقریب سے خطاب کرتے ہوئے بلاول نے بتایا کہ سندھ حکومت بچوں کی صحت کے حوالے سے اہم اور انقلابی اقدامات کر رہی ہے، جن کی عالمی سطح پر پذیرائی ہو چکی ہے۔
انہوں نے مزید کہا کہ سندھ میں بچوں کی اموات کی شرح 1.2 فیصد ہے، جبکہ دیگر صوبوں میں یہ 1.4 فیصد ہے۔ انہوں نے تھر میں بچوں کی ہلاکتوں کی بڑھا چڑھا کر پیش کیے جانے کی تنقید کی اور بتایا کہ سندھ حکومت نے ضلعی سطح پر چائلڈ لائف ایمرجنسی سینٹرز قائم کیے ہیں، جس کے نتیجے میں بچوں کی شرح اموات میں نمایاں کمی آئی ہے۔
بلاول کا کہنا تھا کہ ان کا خواب ہے کہ ہر ضلع میں چائلڈ لائف ایمرجنسی سہولت فراہم کی جائے۔
انہوں نے مزید کہا کہ سندھ نے پبلک پرائیویٹ پارٹنرشپ کے معاملے میں وفاق کو پیچھے چھوڑ دیا ہے اور یہ اقدام بے نظیر بھٹو نے متعارف کرایا تھا۔ انہوں نے سول اسپتال کے کنٹرول روم کا دورہ بھی کیا اور کہا کہ یونیورسٹی آف کیلی فورنیا نے کراچی اور لاڑکانہ کے سول اسپتال کے معیار کو تسلیم کیا اور سندھ میں بچوں کی اموات میں کمی کو بھی سراہا ہے۔
