بدین ،الخدمت آرفن کیئر کے تحت سندھ بھر میں قائداعظم ڈے منایا گیا

بدین(نمائندہ جسارت )الخدمت آرفن فیملی سپورٹ پروگرام کے تحت بدین سمیت سندھ بھرمیں موجود تمام کلسٹرز میں 25 دسمبر کی مناسبت سے قائداعظمؒ ڈے منایاگیا۔ اس سلسلے میں تمام کلسٹر میں پروگرامات کاانعقاد کیاگیا جس میں باہمت بچوں اور ان کی ماؤں نے شرکت کی ان پروگرامات میں بچوں کے لیے ڈرائنگ اور تقریری مقابلوں کابھی اہتمام کیا گیا، جس میں باہمت بچوں نے بڑھ چڑھ کر حصہ لیا اور اپنے خیالات کا اظہار کیا۔تقریری مقابلوں میں بچوں نے قائداعظمؒ محمد علی جناح کی شخصیت، ان کی قربانیوں، اور پاکستان کے قیام کے لیے ان کی جدوجہد پر روشنی ڈالی۔ اس موقع پر اساتذہ کرام اورجماعت اسلامی ضلع بدین کے جنرل سیکرٹری عبدالکریم بلیدی الخدمت فائونڈیشن ضلع بدین کے صدر غلام رسول احمدانی نے اپنے خطاب میں قائداعظم ؒ محمدعلی جناح کی قیادت اور اصولوں پر گفتگو کرتے ہوئے حاضرین کو بتایا کہ قائداعظمؒ کی انتھک محنت اور بصیرت کے باعث پاکستان کا خواب حقیقت میں بدلا۔ ان کامزید کہناتھاکہ قائداعظمؒ کی قیادت میں مسلمانوں کو نہ صرف اپنی شناخت ملی بلکہ ایک علیحدہ ریاست کا خواب بھی شرمندہ تعبیرہوسکا۔ قائداعظمؒ نے ہمیشہ اتحاد، تنظیم، اور یقینِ محکم پر زور دیا، جو آج بھی ہمارے لیے مشعلِ راہ ہیں۔ ان کی بصیرت اور دانشمندی نے برصغیر کے مسلمانوں کو ایک پلیٹ فارم پر جمع کیا اور آزادی کی جدوجہد میں کامیابی دلائی۔ پروگرام کے اختتام پرڈرائنگ اورتقریری مقابلوں میں بہترین کارکردگی کا مظاہرہ کرنے والے بچوں میں انعامات بھی تقسیم کیے گئے۔