پل کا کردار ادا کرسکتا ہوں،اسپیکر قومی اسمبلی بات چیت کیلیے تیار ہیں،پی ٹی آئی

اسلام آباد (مانیٹرنگ ڈیسک)اسپیکر قومی اسمبلی نے کہا ہے کہ حکومت اور اپوزیشن کے درمیان مذاکرات کے لیے پل کا کردار ادا کرسکتاہوںجبکہ پی ٹی آئی کا کہنا ہے کہ وہ بات چیت کے لیے تیار ہے۔ تفصیلات کے مطابق اسپیکر قومی اسمبلی ایاز صادق نے حکومت اور اپوزیشن کے درمیان مذاکرات کے لیے اپنی خدمات پیش کرتے ہوئے کہا ہے کہ اختلافات ختم کرنے کے لیے بات چیت ضروری ہے اور اس کے لیے میرا دفتر ہر وقت حاضر ہے۔ ایاز صادق نے ایک
وڈیو بیان جاری کیا جس میں ان کا کہنا تھا کہ اسپیکر کا دفتر اور گھر حکومت اور اپوزیشن کا ہوتا ہے، اسپیکر کے دروازے ہر وقت اپنے اراکین کے لیے کھلے رہتے ہیں، چاہے ایوان کی کارروائی چل رہی ہو یا نہیں‘ حکومت اور اپوزیشن تلخی ختم کرنے، ملکی مفاد پر بات کرنے یا لا اینڈ آرڈر کے معاملات پر گفتگو کرنا چاہیں تو آجائیں۔ان کا کہنا تھا کہ اس کے علاوہ موسمیاتی تبدیلی، صوبوں کی خود مختاری سمیت بے شمار دیگر مسائل ہیں، جن پر حکومت اور اپوزیشن کو بات کرنی چاہیے تو میں اس کے لیے تیار ہوں، آئیں اور بیٹھ کر بات کریں‘ سیاسی ایشوز سمیت کسی بھی معاملے پر مذاکرات میں کردار ادا کرنے کو تیار ہوں۔ تحریک انصاف نے کہا ہے کہ ملک میں سیاسی استحکام اور ترقی کے لیے بات چیت کو تیار ہیں، مذاکرات سے ہی مسائل کا حل نکلے گا۔ تحریک انصاف کی پارلیمانی پارٹی اجلاس کا اعلامیہ جاری کردیا گیا جس میں کہا گیا ہے کہ بانی تحریک انصاف نے مثبت سوچ کے ساتھ مذاکراتی کمیٹی تشکیل دی اور وہ چاہتے ہیں کہ ملک آگے چلے اور ترقی کرے۔پارلیمانی پارٹی اجلاس میں تحریک انصاف پنجاب کے اراکین قومی و صوبائی اسمبلی کے گھروں اور ڈیروں پر چھاپوں کی بھرپور مذمت کی گئی۔ اعلامیہ میں کہا گیا کہ تحریک انصاف کے ایم این ایز اور ایم پی ایز پر دبائو ڈالنا بند کیا جائے، چھاپوں کا سلسلہ جاری رہنے پر ایوان میں بھرپور احتجاج کا بھی فیصلہ کیا گیا۔اعلامیہ میں کہا گیا کہ حکومت نے ملک کو جن مسائل سے دوچار کرنے کی کوشش کی ان کا حل مذاکرات سے ہی نکلے گا، سیاسی استحکام کے بغیر ملک ترقی نہیں کر سکتا۔پارلیمانی پارٹی نے بانی تحریک انصاف سمیت تمام سیاسی اسیران کی فوری رہائی، 9 مئی اور26 نومبر کے واقعات پر فوری جوڈیشل کمیشن کی تشکیل کا بھی مطالبہ کیا۔پارلیمانی پارٹی نے 26 نومبر کے شہدا کو خراج عقیدت پیش کرتے ہوئے کہا کہ 9 مئی اور 26 نومبر کے واقعات کی شفاف تحقیقات کے لیے جوڈیشل کمیشن ناگزیر ہے، تحریک انصاف کی قیادت اپنے شہدا کے ساتھ کھڑی ہے۔
پی ٹی آئی