ریاض(اسپورٹس ڈیسک)چیئرمین پی سی بی محسن نقوی نے سعودی عرب کو کرکٹ کے فروغ اور اسٹیڈیمز کی تعمیر کے حوالے سے ہر ممکن تعاون کی پیشکش کر دی۔پاکستان کرکٹ بورڈ کے چیئرمین محسن نقوی نے سعودی عربیہ کرکٹ فیڈریشن کے چیئرمین شہزادہ سعود بن مشعل السعود سے ملاقات کی ہے ۔محسن نقوی نے چیئرمین سعودی عربیہ کرکٹ فیڈریشن کو آی سی سی چمپئنز ٹرافی ٹورنامنٹ کے میچز دیکھنے کیلیے پاکستان کے دورے کی دعوت دیدی ۔ تفصیل کے مطابق ملاقات میں سعودی عرب میں کرکٹ کے فروغ اور کھلاڑیوں کی ڈویلپمنٹ پر تبادلہ خیال کیا گیا۔ محسن نقوی کی کرکٹ کے فروغ اور اسٹیڈیمز کی تعمیر سمیت سعودی عرب کے کھلاڑیوں کو تربیت دینے کیلئے ہر ممکن تعاون کی پیشکش کرتے ہوے کہا کہ کرکٹ ڈویلپمنٹ کے لئے پلئیرز ایکسچینج پروگرام شروع کیا جا سکتا ہے۔ سعودی عرب اپنے ابھرتے ہوئے کھلاڑیوں کو پاکستان بجھوا سکتا ہے۔ محسن نقوی نے کہا کہ کرکٹ ڈویلپمنٹ اور اسٹیڈیمز کی تعمیر کے حوالے سے پوری معاونت کریں گے۔ سعودی عرب ہر پاکستانی کا دوسرا گھر ہے۔ تعاون پر خوشی ہو گی۔ اس موقع پر چئیرمین سعودی عربیہ کرکٹ فیڈریشن نے کہا کہ ہم پلئیرز ڈویلپمنٹ پر کام کر رہے ہیں۔سعودی عرب میں کرکٹ کے تقریبا18ہزار کھلاڑی ہیں۔ پاکستان کے ساتھ کرکٹ کے فروغ کیلئے قریبی تعاون کے ساتھ کام کرنا چاہتے ہیں۔
