الخدمت کا رابطۃ المدارس امتحانات سے قبل حفاظ کیلیے ٹیسٹ کا اہتمام

کراچی(اسٹاف رپورٹر )الخدمت شعبہ تعلیم (مدارس)کے تحت رابطۃ المدارس کے سالانہ ا متحان سے قبل حفاظ طلبہ وطالبات کے لیے ٹیسٹ کا اہتمام کیا گیا ،جس میں کثیرتعداد
میں حفاظ نے شرکت کی ۔ ٹیسٹ میں اساتذہ نے بچوں کا امتحان لیا ۔ایگزیکٹو ڈائریکٹر راشد قریشی ڈائریکٹر ایچ آرحبیب الرحمن، ڈائریکٹر مواخات پروگرام یوسف محی الدین اور ڈائریکٹر کمیونٹی سروسز قاضی سید صدرالدین اور الخدمت آزاد کشمیر سے آنے والے ایک وفد نے امتحانی کا عمل معائنہ کیا۔ الخدمت شعبہ تعلیم کے قائم مقام ڈائریکٹر عنایت اللہ اسماعیل اور منیجر ابو اسید نے امتحانی عمل کا جائزہ لینے کے آنے والے ذمے داران کو مدارس میں جاری تعلیمی وامتحانی عمل سے متعلق تفصیلات سے آکاہ کیا ۔اس موقع پر ایگزیکٹو ڈائریکٹر الخدمت کراچی راشد قریشی نے کہا کہ الخدمت کراچی 1976ء سے بچوں اوربچیوں کو قرآن پاک کی تعلیم دینے کے لیے سرگرم عمل ہے اوراب تک لاکھو ں بچے الخدمت کے مدارس سے قرآن پاک کی تعلیم حاصل کرچکے ہیں جبکہ ہزاروں طلبہ طالبات قرآن پاک کو حفظ کرکے اس کی تعلیمات کو اپنے سینوں میں اتارچکے ہیں ۔انہوں نے کہاکہ اس ٹیسٹ کے عمل میں شریک بچے ان شااللہ ایک ماہ کی تیاری کے بعد جب سالانہ امتحانات میں شریک ہوںگے توہمیں امیدہے کہ وہ رابطۃ المدارس کے امتحانی عمل میں بہترین اعزازحاصل کریں گے۔