کراچی:امیرجماعت اسلامی کراچی منعم ظفر خان کاکہنا ہےکہ وزیر اعلیٰ سندھ مراد علی شاہ سن لیں کہ جامعات کی خود مختاری پر حملہ،کراچی اور سندھ کی دیگر یونیورسٹیز کے طلبہ میں دوہرا معیار کسی صورت قابل قبول نہیں۔8دسمبر کو کراچی میں ایم ڈی کیٹ ٹیسٹ منعقد ہورہا ہے، ہمارا مطالبہ ہے کہ 12886طلبہ کے لیے کراچی میں مراکز بڑھائے جائیں۔
ادارہ نورحق میں پریس کانفرنس کرتے ہوئے منعم ظفرخان نے کہا کہ ایم ڈی کیٹ کے امتحان کے لیے ایکسپو سینٹر کا استعمال کیا جائے،اس سال اور گزشتہ سال جو لوگ بھی ایم ڈی کیٹ ٹیسٹ کا پیپر لیک کرنے میں شامل تھے ان کے خلاف سخت سے سخت کاروائی کی جائے اور ایم ڈی کیٹ ٹیسٹ صاف و شفاف بنایاجائے۔
امیر جماعت اسلامی کراچی کاکہنا تھا کہ کراچی یونیورسٹی پاکستان کی سب سے بڑی جامعہ ہے،ہم انجمن اساتذہ جامعہ کراچی،فیڈریشن آف آل پاکستان یونیورسٹیز اکیڈمی اسٹاف ایسوسی ایشن کے تمام جائز مطالبات جو جامعات کی خود مختاری کے حوالے سے ہیں مکمل حمایت کرتے ہیں۔
انہوں نے مزید کہاکہ جامعات کے اساتذہ نے پورے سندھ میں یوم سیاہ منانے کا اعلان کیا ہے،یوم سیاہ منانے کا مقصد تعلیمی اداروں میں سفارش، دھونس اور کرپشن کے نظام کو ختم کرنا ہے،ہم جامعات کے یوم سیاہ کی پرزور حمایت کرتے ہیں۔
منعم ظفر خان کا مزید کہنا تھا کہ ٹینکر مافیا سندھ حکومت اور کراچی واٹر اینڈ سیوریج کارپوریشن کی سرپرستی میں شہرمیں کھلے عام گھوم رہے ہیں،کراچی واٹر اینڈ سیوریج کارپوریشن کو اپنا نام تبدیل کر کے ٹینکر کارپوریشن رکھ لینا چاہیے،گزشتہ 2ماہ میں نیپا، صفورہ،ماڈل ٹاؤن،کورنگی سمیت کراچی کے دیگر علاقوں میں ڈمپر اور ٹینکر کے ذریعے سے معصوم شہریوں کی ہلاکت کے درجنوں واقعات رونما ہوئے ہیں۔سندھ حکومت بتائے کہ کیا شہریوں کی جان و مال کا تحفظ کون کرے گا؟
