بلاوائیو(اسپورٹس ڈیسک)زمبابوے کیخلاف ٹی 20 سیریز کیلئے پاکستان ٹی 20 اسکواڈ میں شامل کھلاڑی زمبابوے کے شہر بلاوائیو پہنچ گئے ۔قومی ٹی 20 اسکواڈ میں شامل کھلاڑی عثمان خان، سفیان مقیم، صاحبزادہ فرحان، عرفات منہاس، عمیر بن یوسف اور قاسم اکرم براستہ دبئی بلاوائیو پہنچے ۔پاکستان ٹی 20 ٹیم کے کپتان سلمان علی آغا ، حارث رئوف، حسیب اللہ، محمد حسنین، عرفان خان، طیب طاہر ،صائم ایوب، ابرار احمد، عامر جمال، جہانداد خان، عباس آفریدی پہلے سے بلاوائیو موجود ہیں ۔ گزشتہ روز میچ سے ایک روز قبل گرین شرٹس نے اسٹیڈیم میں بھرپور پریکٹس کی اور بولنگ، فیلڈنگ اور بیٹنگ کی کمزوریوں کو دور کیا۔پاکستان ون ڈے اسکواڈ کے کپتان محمد رضوان، عبداللہ شفیق، کامران غلام اور فیصل اکرم گزشتہ روز زمبابوے سے وطن واپس پہنچ گئے۔واضح رہے کہ پاکستان اور زمبابوے کے درمیان 3 ٹی 20 میچوں کی سیریز کا پہلا میچ آج کھیلا جائے گا۔
