بلاوائیو (اسپورٹس ڈیسک):زمبابوے اور پاکستان کی کرکٹ ٹیموں کے درمیان3 ٹی ٹوئنٹی انٹرنیشنل میچوں پر مشتمل سیریز کا آغاز کل کوئنز اسپورٹس کلب بلاوائیو میں پہلے میچ سے ہوگا۔ پاکستان کرکٹ ٹیم کا آپشنل ٹریننگ سیشن میںکھلاڑیوں نے کوئینز اسپورٹس کلب میں نیٹ پریکٹس کی۔ کھلاڑیوں نے بولنگ اور بیٹنگ کی پریکٹس کی ۔ دریں اثنا پاکستان ٹی ٹوئنٹی ا سکواڈ میں شامل کھلاڑی بلاوائیو پہنچ گئے ۔ عثمان خان ، سفیان مقیم ، صاحبزادہ فرحان، عرفات منہاس ، عمیر بن یوسف اور قاسم اکرم براستہ دبئی بلاوائیو پہنچے ۔ پاکستان ٹی ٹوئنٹی ٹیم کے کپتان سلمان علی آغا ، حارث رئوف، حسیب اللہ ، محمد حسنین، عرفان خان ، طیب طاہر ،صائم ایوب ، ابرار احمد ، عامر جمال ، جہانداد خان ، عباس آفریدی پہلے سے بلاوائیو موجود ہیں ۔ پاکستان ون ڈے اسکواڈ کے کپتان محمد رضوان، عبداللہ شفیق، کامران غلام اور فیصل اکرم آج زمبابوے سے وطن واپس روانہ ہو گئے۔3 ٹی ٹوئنٹی میچز کی سیریز میں میزبان اسکواڈ کی قیادت سکندر رضا کریں گے جبکہ مہمان پاکستانی ٹیم کو سلمان آغا لیڈ کریں گے۔ دونوں ٹیموں کے درمیان 3 ٹی ٹوئنٹی کرکٹ میچوں کی سیریز کا آغاز کل ہوگا ،دوسرا ٹی ٹوئنٹی 3 دسمبر اور تیسرا و آخری میچ 5 دسمبر کو کھیلا جائے گا، تینوں ون ڈے ایک ہی مقام کو ئنز ا سپورٹس کلب بلاوائیو میں کھیلے جائیں گے ۔
