کراچی( اسٹاف رپورٹر ) شہر کے مختلف علاقوں میں حادثات و واقعات میں خاتون سمیت8افراد جاںبحق ہوگئے دیگر واقعات میں12افراد زخمی ہوئے۔ پولیس نے موقع پر پہنچ کر ڈرائیور کو گرفتار کرلیا۔ تفصیلات کے مطابق شہر قائد میں ایک گھٹنے کے دوران فائرنگ کے واقعات میں 3 شہری قتل ،2 شہری ڈکیتی میں مزاحمت پر اور ایک شہری ذاتی دشمنی پر قتل ہوا۔ سکھن تھانے کی حدود لانڈھی بھینس کالونی روڈ نمبر 12 نیازی کانٹا کے قریب ڈکیتی کے دوران مزاحمت پر فائرنگ سے ایک شخص جاںبحق اور دوسرا زخمی ہوگیا۔ مقتول اور زخمی کو قانونی کارروائی کے لیے جناح اسپتال منتقل کر دیا گیا جہاں مقتو ل کی شناخت22 سالہ مظہر اور زخمی کی20سالہ یعقوب ولد اشرف کے ناموں سے ہوئی۔ میٹروول باوانی چالی چڑھائی کے قریب ڈکیتی کے دوران مزاحمت پر گولی لگنے سے 52 سالہ رزاق خان ولد بہران خان نامی شخص جاںبحق ہوگیا۔ مقتول کی لاش کو قانونی کارروائی کے لیے عباسی شہید اسپتال منتقل کر کے تفتیش کا آغاز کر دیا گیا۔ بن قاسم تھانے کی حدود گھکھر پھاٹک مین بازار زین کمیونی کیشن کے قریب فائرنگ سے 20سالہ سرفراز ولد نجم الدین جاں بحق ہوگیا ،مقتول کی لاش کو قانونی کارروائی کے لیے اسپتال منتقل کر دیا گیا۔ پولیس کا کہنا ہے کہ بھاری نقدی اور موبائل فون اپنی جگہ موجود ہے۔ مقتول کا آبائی تعلق شکار پور سے بتایا جارہا ہے۔ قتل ذاتی دشمنی کا شاخسانہ معلوم ہوتا ہے‘ مزید تفتیش جاری ہے۔ ترجمان کا کہنا ہے کہ وزیراعلیٰ سندھ سید مراد علی شاہ نے اسٹریٹ کرائم کے حوالے سے واقعہ کا نوٹس لیتے ہوئے ایڈیشنل آئی جی کراچی سے رپورٹ طلب کرلی ہے۔ شاہراہ فیصل کے قریب کارساز پر تیز رفتار منی ٹرک نے موٹرسائیکل سوار افراد کو کچل ڈالا۔ پولیس حکام نے بتایا کہ موٹرسائیکل پر دو خواتین ،ایک مرد اور دو بچے سوار تھے۔ اچانک تیز رفتارا ٹرک نے موٹرسائیکل کو ٹکر ماری، حادثے میں ثنا جاوید نامی خاتون موقع پر ہی دم توڑ گئی جبکہ دیگر افراد زخمی ہوئے جنہیں اسپتال میں طبی امداد دی جارہی ہے۔ شارع فیصل پرکارساز کے قریب دوسرا ٹریفک حادثہ صبح پیش آیا جس میں چالیس سال کا شاہد جان سے گیا۔ پولیس نے بتایا ہے کہ ٹرک حادثے میں 4 افراد زخمی بھی ہوئے ہیں۔ خاتون کی لاش اور تمام زخمیوں کو جناح ہسپتال منتقل کردیا گیا ہے۔ عزیز بھٹی تھانے کی حدود ڈالمیا روڈ نیوی گیٹ کے قریب تیز رفتار گاڑی کی ٹکر سے ایک راہ گیر شخص جاںبحق ہوگیا ۔ سولجر بازار تھانے کی حدود نمائش چورنگی کے قریب تیز رفتار گاڑی کی ٹکر سے 30سالہ نوجوان جاں بحق ہوگیا۔ متوفی کی لاش کو سول اسپتال منتقل کر دیا گیا تاحال متوفی کی شناخت نہ ہوسکی۔ ادھر پاک کالونی تھانے کی حدود پرانا گولیمار بے نظیر پارک کچرا کنڈی سے40سالہ شخص کی لاش ملی۔
