سکھر (نمائندہ جسارت) پولیس پکٹ پر ڈاکوؤں کی فائرنگ سے شہید ہونے والے پولیس کانسٹیبل اربیلو چاچڑ کی نماز جنازہ پولیس لائین ہیڈکوارٹر سکھر میں ادا کی گئی، شہید کی مغفرت اور بلند درجات کے لیے اجتماعی دعائیں مانگی گئیں، ڈی آئی جی سکھر فیصل عبداللہ چاچڑ،ایس ایس پی سکھر امجد احمد شیخ، سیکٹر ونگ کمانڈر بریگیڈئر ندیم سمیت دیگر پولیس افسران و اہلکار، صحافی حضرات، سیاسی و سماجی شخصیات نے بڑی تعداد میں نمازِ جنازہ میں شرکت کی یاد رہے کہ گزشتہ رات تھانہ گدپور کی حدود سرگو دمدموں پکٹ پر ڈاکوؤں کے حملے میں پولیس کانسٹیبل اربیلو چاچڑ شہید جبکہ ایک ا اہلکار رضا محمد مگسی شدید زخمی ہوگیا تھا ، شہید کے جسد خاکی کو سکھر پولیس کے چاک و چوبند دستے نے سلامی پیش کی، شہید کے جسد خاکی کو پاکستان و سندھ پولیس کے پرچم میں لپیٹا گیا تھا۔ اس موقع پر ڈی آئی جی سکھر نے کہا کہ ضلع میں امن کے قیام کیلئے اپنی جانوں کا نذرانہ پیش کرنے والے پولیس آفیسرز و جوان محکمہ کا فخر ہیں، شہید پولیس اہلکار کی قربانی کبھی رائیگاں نہیں جائیں گیں، ایس ایس پی نے کہا کہ پولیس کے حوصلے بلند ہیں اور ان شا اللہ متقی انجام تک پہنچنے تک ڈاکوؤں کیخلاف آپریشن جاری رہے گا۔ نماز جنازہ کی ادائیگی کے بعد شہید کے جسد خاکی کو ان کے آبائی گاؤں میں سپرد خاک کر دیا گیا ۔
