کراچی ( اسٹاف رپورٹر ) نارتھ ناظم آباد فائیو اسٹار چورنگی پرڈکیتی مزاحمت پر فائرنگ سے زخمی 4 بچوں کا باپ اسپتال میں دوران علاج دم توڑ گیا۔تفصیلات کے مطابق حیدری مارکیٹ تھانے کی حدود نارتھ ناظم آباد سخی حسن سے حیدری جاتے ہوئے فائیو اسٹار چورنگی پل پر ڈکیتی کے دوران مزاحمت پر گولی لگنے سے 30سالہ سلمان ولد انور جاں بحق ہوگیا ۔ مقتول لیاقت آباد نمبرایک رحمانیہ مسجد کے قریب کا رہائشی، 4 بچوں کا باپ اور کیٹرنگ کا کام کرتا تھا۔ لاش کو ہسپتال منتقل کر دیا گیا۔ مزید تفتیش جاری ہے۔مقتول سلمان اپنے دوست بلال کے ہمراہ نارتھ ناظم آباد بلاک ایل میں واقع اپنے دوست کے گھر سے واپس اپنے گھر جا رہا تھا۔دوست بلال اور واقع کے عینی شاہد نے بتایا کہ فائیو اسٹار فلائی اوور پر 2 موٹر سائیکل سوار 4 ڈکیتوں نے لوٹ مار کی کوشش کی، مقتول سلمان کا پرس کارڈ، لائسنس یافتہ پستول لیکر فرار ہوگئے جبکہ مقتول کا موبائل فون واردات کے دوران گر گیا۔پولیس کا کہنا ہے کہ ملزمان کی جانب سے ایک گولی چلائی جو مقتول کے سینے میں لگی اور جان لیوا ثابت ہوئی جبکہ پولیس کو جائے وقوع سے ایک گولی اور ایک خول ملا ہے۔ حیدری مارکیٹ پولیس کے مطابق ڈکیتی کی واردات کے دوران مزاحمت پر فائرنگ کا واقعہ سخی حسن چورنگی سے حیدری جاتے ہوئے فائیواسٹار پل پر پیش آیا۔
