لاہور (اسپورٹس ڈیسک) جنوبی افریقا کی بلائنڈ کرکٹ ٹیم چوتھے ٹی 20 بلائنڈ کرکٹ ورلڈ کپ میں شرکت کے لیے گزشتہ روز پاکستان پہنچ گئی۔ پاکستان بلائنڈ کرکٹ کونسل کے چیئرمین اور ورلڈ بلائنڈ کرکٹ لمیٹڈ کے صدر سیدسلطان شاہ نے کو بتایا کہ جنوبی افریقا کی ٹیم ورلڈ ٹی ٹوئنٹی بلائنڈ کرکٹ کپ میں شرکت کے لئے لاہور ائیرپورٹ پہنچ گئی ،جہاں پرپاکستان بلائنڈ کرکٹ کونسل کے حکام نے ان کا پرتپاک استقبال کیا ۔ انہوں نے کہا کہ افغانستان کی ٹیم ایونٹ میں شرکت کے لئے پاکستان پہنچ چکی ہے۔ انہوں نے کہاکہ بنگلا دیش ،نیپال اور سری لنکا کی ٹیمیں آج پاکستان آئیں گی جبکہ بھارتی بلائنڈ کرکٹ ٹیم کو بھارتی وزارت خارجہ کے این او سی کا انتظار ہے ۔سید سلطان شاہ نے کہا کہ تمام غیر ملکی ٹیموں کے لئے بھرپور سکیورٹی کے انتظامات کئے گئے ہیں۔انہوں نے کہا کہ ورلڈ بلائنڈ ٹی ٹوئنٹی کرکٹ کپ کل سے 3 دسمبر 2024 تک لاہور اور ملتان میں کھیلا جارہا ہے جس کی افتتاحی تقریب آج لاہور میں ہوگی۔
