شکارپور (نمائندہ جسارت) 2 علیحدہ علیحدہ گروہوں میں تصادم میں 7 افراد زخمی ہوئے، نیو فوجداری تھانے کی حدود بیگاری وائی کے علاقے میں بھٹا اور بنگلانی برادری کے 2 گروہوں میں تصادم، 6 افراد زخمی ہوگئے، پولیس کے مطابق باغ میں بکری کے گھسنے پر دونوں گروہوں میں تصادم ہوا، گروہوں نے ایک دوسرے پر ڈنڈوں، اینٹوں اور پتھروں کا آزادانہ استعمال کیا جس میں 6 افراد زخمی ہو گئے، پولیس نے جائے وقوعہ پر پہنچ کر کنٹرول کرتے ہوئے زخمیوں کو اسپتال منتقل کردیا، زخمیوں میں امتیاز، غلام رسول، غلام سرور، جواد احمد، عنایت اللہ اور شوکت شامل ہیں، زخمیوں میں 4 افراد کو تشویشناک حالت میں سکھر ریفر کر دیا گیا۔ دوسرے واقعے میں داون شاہ محلے میں شیخ اور رند برادری کے 2 گروہوں میں تلخ کلامی پر جھگڑا ہوا، جس میں ایک شخص زخمی ہوا، مسلح ملزمان نے ڈنڈوں کے وار کرکے سکندر بلوچ کو زخمی کر دیا، زخمی نوجوان کو انتہائی تشویشناک حالت میں سکھر ریفر کر دیا گیا، گلی میں پائپ کے اوپر جمپ لگانے کی معمولی بات پر 2 گروہوں میں تصادم ہوا۔ آخری اطلاع تک نہ کوئی مقدمہ درج ہوا، نہ کوئی گرفتاری عمل میں آئی۔
