کراچی (اسٹاف رپورٹر) سندھ کے سینئر وزیر شرجیل انعام میمن نے کہا ہے کہ بدقستی سے پیپلز پارٹی کے خلاف منفی پروپیگنڈہ اور مہم چلائی گئی، منفی چیزوں اور کہیں پر کام نہ ہونے کو پیپلز پارٹی سے منسوب کیا جاتا تھا، کافی ایسے شعبے ہیں جس میں حکومت سندھ کا کوئی مقابلہ نہیں کرسکتا ، حکومت سندھ نے صحت کے شعبے میں جو سہولیات متعارف کراوئی ہیں وہ صرف سندھ کے لئے نہیں پورے ملک اور پڑوسی ممالک کے عوام کے لئے بھی ہیں، ان سہولیات سے نہ صرف پورا ملک بلکہ پڑوسی ممالک کے شہری بھی مستفید ہو رہے ہیں۔ ڈائریکٹوریٹ آف الیکٹرانک اینڈ پرنٹ میڈیا کلفٹن کراچی میں اسلام آباد کے صحافیوں کے ایک وفد نے سندھ کے سینئر وزیر اور صوبائی وزیر برائے اطلاعات، ٹرانسپورٹ، ماس ٹرانزٹ، ایکسائز، ٹیکسیشن و نارکوٹکس کنٹرول شرجیل انعام میمن سے ملاقات کی۔ سندھ کے سینئر وزیر شرجیل انعام میمن نے کراچی آمد پر اسلام آباد کے صحافیوں کو خوش آمدید کہا، اسلام آباد کے صحافیوں نے سندھ کے مختلف اضلاع کے دورے کے بعد کراچی میں سندھ کے سینئر وزیر شرجیل انعام میمن سے ملاقات کے موقع پر محکمہ صحت، محکمہ تعلیم اور دیگر شعبوں میں حکومت سندھ کے ترقیاتی منصوبوں کی تعریف کی۔ سینئر وزیر شرجیل انعام میمن نے اس موقعے پر وفد سے خطاب کرتے ہوئے کہا کہ اسلام آباد کے صحافی دوست حکومت سندھ کی خصوصی دعوت پر کراچی آئے ہوئے ہیں، ہم ان کو خوش آمدید کہتے ہیں۔
