کراچی (اسٹاف رپورٹر) شہر کے مختلف علاقوں میں پولیس مقابلوں کے دوران مزید 2 ڈاکو مارے گئے جبکہ5 کو گرفتار کرلیا گیا۔ گلشن اقبال میں ہلاک ہونے والا ملزم اوراس کا گرفتار ساتھی دونوں افغان باشندے نکلے۔ تفصیلات کے مطابق مومن آباد تھانے کی حدود اورنگی ٹائون ملک چوک پہاڑی کے قریب پولیس اور مسلح ڈاکوؤں کے درمیان دو طرفہ فائرنگ کے نتیجے میں ایک ڈاکو 25 سالہ نجیب اللہ ولد محمد رسول ہلاک ہوگیا جبکہ اس کے ساتھی 25سالہ حنیف ولد محمد ایوب کوزخمی حالت میں گرفتار کرلیا گیا۔ ہلاک و زخمی ملزمان کے قبضے سے 2 پستول مع گولیاںاور نقدی رقم برآمد کر لی گئی۔ تھانہ ابراہیم حیدری کے علاقے ریڑھی روڈ کے قریب پولیس اور ڈاکوئوں کے درمیان مقابلہ۔ ایس ایس پی ملیر کاشف آفتاب عباسی کے مطابق گشت پر مامور پولیس نے موٹر سائیکلوں پر سوار مشکوک اشخاص کو رکنے کا اشارہ کیا۔ ملزمان نے پولیس پر فائرنگ شروع کردی۔ پولیس کی جوابی فائرنگ سے 1 ملزم موقعے پر ہی ہلاک ہوگیا جب کہ دو ملزمان پولیس پر فائرنگ کرتے ہوئے فرار ہوگئے۔
