لاہور (اسپورٹس ڈیسک) ہیڈ کوچ پاکستان ہاکی ٹیم طاہر زمان کا کہنا ہے کہ ورلڈکپ 2026 کے لیے کوالیفائی کرنا ہدف ہے، اس کے لیے ہماری نظریں نومبر 2025 میں ہونے والے ایشیا کپ پر ہیں۔طاہر زمان نے لاہور میں گفتگو کرتے ہو ئے کہا کہ اس وقت چین میں ہونے والے ایونٹ میں ٹیم بھیجنے کا پلان ہے، چین کا ٹاپ لیول ڈومیسٹک ٹورنامنٹ 11 سے 22 نومبر تک ہو رہا ہے، اس میں پی ایچ ایف ڈویلپمنٹ ٹیم بھیج رہے ہیں۔ہیڈ کوچ پاکستان ہاکی ٹیم کا کہنا تھا کہ ہماری کوشش ہے کہ ایک شارٹ کیمپ لگا کر پی ایچ ایف ڈویلپمنٹ ٹیم بنائیں گے، ٹیم کو 9 تاریخ تک چین بھجوانیکے لیے تمام تر تیاریاں مکمل کرنیکی کوشش کر رہے ہیں۔طاہر زمان نے کہا کہ فنڈز کے بغیر کوئی کام نہیں ہوسکتا، ہائی پرفارمنس پروگرام کو شروع کرنے کے لیے فنڈز کی ضرورت ہے، ہائی پرفارمنس پروگرام نہیں ہوتا تو ورلڈکپ کی کوالیفکیشن کے لیے درست انداز میں تیاری نہیں ہو سکتی ، ہمارا ایک سال میں 25 میچز یورپ میں کھیلنے کا پلان ہے، حکومت سے درخواست ہے فنڈز دے، نجی شعبے سے ہم خود کوشش کر رہے ہیں۔ہیڈ کوچ نے مزیدکہا کہ کھلاڑیوں کا ایک پول تیار کر رہے ہیں تاکہ ان کے آف سیزن میں کیمپ لگائیں، کیمپ میں اسکلز کو بہتر بنانے کی کوشش کی جائیگی تاکہ ورلڈکپ کوالیفکیشن کے لیے اچھی تیاری کی جاسکے۔
