کراچی(اسپورٹس رپورٹر)آسٹریلیا کے خلاف سیریز کے لیے اعلان کردہ پاکستان کے ٹی ٹوئنٹی ا سکواڈ کے 6 کھلاڑی آج سے6 نومبر تک نیشنل اسٹیڈیم کراچی میں کیمپ میں حصہ لیں گے۔ میزبان آسٹریلیا اور پاکستان کے درمیان3 ٹی ٹوئنٹی میچوں کی سیریز 14 سے 18 نومبر تک کھیلی جائے گی۔کیمپ میں شریک کھلاڑی جہانداد خان، محمد عباس آفریدی، عمیر بن یوسف، صاحبزادہ فرحان، سفیان مقیم اور عثمان خان گزشتہ شام کراچی میں جمع ہوئے۔کوچ سعید بن ناصر 5روزہ کیمپ کی نگرانی کریں گے جہاں کھلاڑی تربیتی سیشنز میں حصہ لیں گے۔ کیمپ کے سپورٹ ا سٹاف میں سعید بن ناصر (کوچ) عبدالسعد (کوچ) امتیاز (فزیو) اور تیمور محمود (ٹرینر) شامل ہیں۔کیمپ کے اختتام پر کھلاڑی 10 نومبر کو آسٹریلیا روانہ ہونے سے قبل اپنے شہروں کو روانہ ہو جائیں گے۔پاکستان ٹی ٹوئنٹی اسکواڈ میں محمد رضوان (کپتان)، عرفات منہاس، بابر اعظم، حارث رئوف، حسیب اللہ، جہانداد خان، محمد عباس آفریدی، محمد عرفان خان، نسیم شاہ، عمیر بن یوسف، صاحبزادہ فرحان، سلمان علی آغا، شاہین شاہ آفریدی، سفیان مقیم اور عثمان خان شامل ہیں۔
