کراچی:دفاعی نمائش آئیڈیاز کراچی ایکسپو سینٹر میں 19سے 22 نومبر تک منعقد ہوگی، اس نمائش میں افتتاحی تقریب، دفاعی صنعتوں پر سیمینار اور میٹنگز منعقد کی جائیں گی۔
میڈیا رپورٹس کے مطابق دفاعی نمائش آئیڈیاز 2024 کی 4 روزہ نمائش میں متعدد سرگرمیاں شامل ہوں گی، جس میں دنیا بھر کے نمائش کنندگان اپنی دفاعی مصنوعات اور ساز و سامان پیش کریں گے۔
دوسری جانب وزیر اعلیٰ سندھ مراد علی شاہ نے کہا ہے کہ حکومت اس غیرمعمولی نمائش کے انعقاد کیلیے تمام مدد اور تعاون فراہم کرے گی،اس نمائش کے لیے خصوصی اقدامات کرنے کے لیے ہم تمام اداروں سے مسلسل رابطے میں ہیں۔
خیال رہے کہ گزشتہ کئی سالوں سے دفاعی نمائش آئیڈیاز کراچی ایکسپو سینٹر میں منعقد کی جاتی ہے، اس موقع پر سیکیورٹی کے حوالے سے خصوصی اقدامات کیے جاتے ہیں، اس نمائش میں عوام کے لیے بھی وقت مقرر کیا جاتا ہے۔
