اسلام آباد: وزیر دفاع خواجہ آصف نے کہا ہے کہ 27ویں آئینی ترمیم کی باتیں قیاس آرائیاں ہیں۔جب کہ پاکستان تحریک انصاف (پی ٹی آئی) والے کئی مہینے سے احتجاج احتجاج کھیل رہے ہیں تو کھیلتے رہیں۔
خواجہ آصف نے پارلیمنٹ ہاؤس میں میڈیا سے گفتگو کرتے ہوئے کہا کہ بشریٰ بیگم صاحبہ بھی فرنٹیئر چلی گئی ہیں۔ اور پی ٹی آئی والے ہی کہتے ہیں وزیراعلیٰ خیبر پختونخوا کا سافٹ ویئر اپڈیٹ ہوا ہے۔ لیکن اب بیگم صاحبہ بھی وہاں چلی گئی ہیں۔ یہ کس طرف اشارے مل رہے ہیں۔ انڈر ہینڈ کوئی واردات تو نہیں ہو رہی کیونکہ ہر جگہ رولا پڑا ہوا ہے کہ ان کی کوئی ڈیل یا کوئی انڈر اسٹینڈنگ ہوئی ہے۔
ان کا کہنا تھا کہ بشریٰ بی بی کا اسلام آباد یا لاہور میں گھر ہے وہ وہاں رہتیں۔ لیکن وہ پشاور کیوں چلی گئی ہیں؟ یہ ایک سوالیہ نشان تو بنتا ہے؟
آئینی ترمیم سے متعلق بات کرتے ہوئے انہوں نے کہا کہ 27ویں آئینی ترمیم کی باتیں قیاس آرائیاں ہیں۔ کیونکہ اس قسم کا کام ابھی تک تو کسی طرف سے بھی شروع نہیں ہوا۔
وزیر دفاع کا کہنا تھا کہ فوجی عدالتوں میں مقدمات پہلے بھی چلتے رہے ہیں۔ جبکہ امریکہ میں جو ہنگامے پچھلے انتخابات سے پہلے ہوئے تھے۔ اس کے لیے انہوں نے خصوصی عدالتیں بھی بنائی تھیں۔ یہ صورتحال اس سے بڑی مختلف ہے۔ پی ٹی آئی نے پارلیمنٹ پر بھی حملہ کیا تھا اور ادھر فوجی تنصیبات پر حملہ ہوا ہے۔
