اسلام آباد : چیئرمین پی ٹی آئی بیرسٹر گوہر نے کہا ہے کہ 27 ویں آئینی ترمیم بارے سنا ہے، اس بار بھی اسی طرح مقابلہ کریں گے جیسے پہلے کیا تھا۔
اسلام آباد میں میڈیا سے گفتگو کرتے ہوئے چیئرمین پاکستان تحریک انصاف بیرسٹر گوہر نے کہا کہ ترمیم کے بارے میں سنا ہے اس بار بھی اسی طرح مقابلہ کریں گے جیسے پہلے کیا تھا، ہم عدلیہ سے یہی درخواست کرتے آ رہے تھے آپ ایکشن لے لیں،
انہوں نے کہا کہ ہمیں چیف جسٹس سے کوئی اعتراض نہیں، ہم نے ہمیشہ کہا سارے ججز ہمارے ہیں، چیف جسٹس ہمیشہ سینئر جج بنتا ہے، ہمارا موقف یہی تھا کہ سنیارٹی کی بنیاد پر چیف جسٹس بنایا جائے۔
ان کا کہنا تھا کہ اگر آپ پارٹی کے نمبر توڑ کر اپنے نمبر پورے کریں گے تو مائینارٹی والے نمبر توڑ کر حکومت بنائیں گے، یہ تمام بے بنیاد کیس بناتے ہیں کہ آپ نے دفعہ 144 کی خلاف ورزی کی ہے، سپریم کورٹ کے باہر تقریب کی تھی کہ ایسی کوئی ترمیم نہیں ہونی چاہیے جس سے آزاد عدلیہ پر قدغن لگ جائے، یہ تمام بے بنیاد کیس ہیں ہم ان میں بری ہوں گے۔
