ایران کے سپریم لیڈر علی خامنہ ای نے اسرائیل سے کہا ہے کہ ایران پر حملہ کرکے اُس نے بھیانک غلطی کی ہے جس کا خمیازہ اُسے بھگتنا ہی پڑے گا کیونکہ اس حملے کا بھرپور جواب دینا اب ایران کے لیے وقار کا مسئلہ ہے۔ ایرانی قوم اس حوالے سے پُرعزم ہے اور کسی بھی وقت اسرائیل کو نشانہ بنانے کے لیے تیار ہے۔
علی خامنہ ای نے سوشل میڈیا پلیٹ فارم ایکس پر عبرانی زبان میں اکاؤنٹ لانچ کرکے انتباہ کیا کہ اب ایران کے لیے لازم ہوچکا ہے کہ اپنی بھرپور قوت کا مظاہرہ کرے۔ علی خامنہ ای نے لکھا کہ اسرائیل کو اپنی قوت پر ناز ہے مگر اُسے ایران کی حقیقی قوت کا ابھی اندازہ نہیں۔
علی خانہ ای نے لکھا کہ اسرائیلی حملے کے نتائج کو بہت بڑھا چڑھاکر بیان کیا جارہا ہے۔ ایرانی قیادت کو اچھی طرح اندازہ ہے کہ اُسے اب کیا کرنا ہے اور کب کرنا ہے۔
ایکس کی انتظامیہ نے اسرائیل کو دھمکی دیے جانے پر ایران کے سپریم لیڈر کا عبرانی زبان کا اکاؤنٹ چند ہی گھنٹوں میں معطل کردیا۔ اس حوالے سے انتظامیہ کی طرف سے کوئی وضاحت نہیں کی گئی ہے۔
