مذاکرت میں دائرہ کار کا تعین پاکستان اور بھارت کا معاملہ ہے،امریکا

واشنگٹن (صباح نیوز)امریکہ نے بھارتی وزیر خارجہ کے حالیہ دورہ پاکستان کا خیرمقدم کرتے ہوئے کہا ہے کہ وہ پاکستان اور بھارت دونوں کے ساتھ اپنے تعلقات کو قدر کی نگاہ سے دیکھتاہے۔ ترجمان امریکی محکمہ خارجہ میتھیو ملر نے بھارتی وزیر خارجہ اور پاکستانی رہنماوں کی ملاقات پر ردعمل دیتے ہوئے کہا کہ دونوں ممالک کے ساتھ ہمارے دوطرفہ تعلقات ہیں۔ترجمان امریکی محکمہ خارجہ کے مطابق دونوں ممالک کے مابین کسی بھی بات چیت کے دائرہ کار اور کردار کا تعین پاکستان اور بھارت کا معاملہ ہے۔ واضح رہے کہ بھارتی وزیر خارجہ جے ایس شنکر شنگھائی تعاون تنظیم کے 23 ویں اجلاس میں شرکت کے لیے اسلام آباد پہنچے تھے۔ جے ایس شنکر نے وزیر اعظم شہباز شریف کی جانب سے دی جانے والی ضیافت میں شرکت کی، اور اسحاق ڈار سے ملاقات بھی کی۔