لندن (آن لائن)آکسفورڈ یونیورسٹی چانسلر کی دوڑ سے بانی پی ٹی آئی کے باہر ہونے پر پی ٹی آئی رہنما زلفی بخاری نے کہا ہے کہ بانی پی ٹی آئی کا نام آکسفورڈ چانسلر کے الیکشن سے خارج ہونا افسوسناک ہے۔ میرے وکلا نے یونیورسٹی کو خط لکھ کر ان کی وجہ پوچھی ہے۔اپنے ردعمل میں زلفی بخاری نے کہا کہ ہم نے ان کی درخواست سے پہلے کئی وکلا اور بیرسٹرزکی رائے لی تھی۔ یہ آکسفورڈ یونی کے لیے ایک نقصان ہے کہ وہ خود کو عالمی ٹرینڈ ساز ادارے کے طور پر پیش کرے۔ میں ان تمام لوگوں کا شکریہ ادا کرتا ہوں جنہوں نے عالمی سطح پر حمایت کی۔ انہوںنے کہا کہ میں دنیا بھر کے پاکستانیوں سے معذرت خواہ ہوں کہ میں اس کوشش میں کامیاب نہیں ہوا۔ میں جانتا ہوں کہ بہت سے لوگ بانی پی ٹی آئی کو آکسفورڈ کے نئے چانسلر کے طور پر دیکھنا چاہتے تھے۔
