اسلام آباد : شنگھائی تعاون تنظیم (ایس سی او) کے سربراہی اجلاس سے قبل سیکیورٹی کے اقدامات کو نمایاں طور پر سخت کر دیا گیا ہے، پولیس نے اضافی چیک پوسٹیں قائم کی ہیں اور شہر بھر میں 1,200 سے زائد اہلکار تعینات کیے ہیں۔
پولیس ذرائع کے مطابق 30 اضافی چیک پوسٹیں قائم کی گئی ہیں اور 1,287 اہلکاروں کو اہم مقامات پر تعینات کیا گیا ہے ۔
نئے سیکیورٹی پوائنٹس کی نگرانی 4 ایس پیز اور 43 ڈی ایس پیز کر رہے ہیں، چیک پوسٹیں بڑی شاہراہوں جیسے ایمبیسی روڈ، سری نگر ہائی وے اور ناظم الدین روڈ کے ساتھ قائم کی گئی ہیں۔
دیگر قابل ذکر علاقوں جیسے آغا خان روڈ، قائد اعظم یونیورسٹی چوک، اور شاہدرہ روڈ پر بھی سیکیورٹی میں اضافہ کیا گیا ہے۔
ان اقدامات کا بنیادی مقصد ریڈ زون تک عوامی رسائی کو محدود کرنا ہے، جہاں اجلاس منعقد کیا جا رہا ہے، خصوصاً جناح ایونیو کے اطراف میں مکمل طور پر سخت انتظامات کیے گئے ہیں ۔
اسلام آباد ایکسپریس ہائی وے بشمول فیض آباد سے آئی-8 کو دونوں اطراف سے بند کر دیا گیا ہے، تاہم راولپنڈی میں سروس روڈز کے ذریعے متبادل راستے کھلے رہیں گے ۔
سیکیورٹی کے باوجود ریڈ زون کے باہر اور بلیو ایریا جیسے علاقوں میں سروس روڈز پر ٹریفک جاری ہے۔
اگرچہ ٹریفک جام کی اطلاعات موجود ہیں، لیکن حکام نے تصدیق کی ہے کہ راولپنڈی اور اسلام آباد کے درمیان اہم متبادل راستے کھلے رہیں گے۔
