ہاکی ایونٹ قاضی محب ہاکی اسٹیڈیم بنوں میں شروع ہو گیا

پشاور(ا سپورٹس ڈیسک)بنوں اسپورٹس گالا ہاکی ایونٹ قاضی محب ہاکی اسٹیڈیم بنوں میں شروع ہو گیا۔افتتاحی میچ میں باچا خان ہاکی کلب بنوں نے شاندار کھیل کامظاہرہ کرتے ہوئے خادم ہاکی کلب بنوں کو 16-0 سے شکست دے دی۔باضابطہ افتتاح ریجنل ا سپورٹس آفیسر پشاور کاشف فرحان نے کیا ان کے ہمراہ ریجنل اسپورٹس آفیسر بنوں شفقت سمیت دیگر شخصیات موجود تھیں۔ قاضی محب ہاکی اسٹیڈیم میں منعقدہ میچ میں باچا خان کلب نے جارحانہ کھیل کامظاہرہ کیا، پہلے کوارٹر میں 7-0 کی برتری حاصل کی اور ہاف ٹائم تک اپنی برتری کو 10-0 تک بڑھا دیا۔ انہوں نے تیسرے کوارٹر میں اپنا حملہ جاری رکھا، مزید 5 گول کر کے اسکور15-0 کر دیا۔ آخری کوارٹر میں انہوں نے ایک آخری گول سے فتح پر مہر ثبت کرتے ہوئے میچ 8 منٹ قبل ختم کر دیا۔ مامون، سعد اللہ، فیضان اور احمد کی طرف سے قابل ذکر پرفارمنس سامنے آئی۔