اسلام آباد (صباح نیوز) فوجی مشق کیمبرین پیٹرول2024ء میں پاک فوج کی ٹیم نے غیر معمولی کارکردگی دکھائی، جس پر ٹیم کو گولڈ میڈل سے نوازا گیا۔ آئی ایس پی آر کے مطابق فوجی مشق برطانیہ کے علاقے ویلز میں4 سے13 اکتوبر کے دوران منعقد ہوئیں، اس سال ایکسرسائز کیمبرین پیٹرول کے انعقاد کے65 سال مکمل ہوئے۔ مشق کے دوران ٹیموں کو بہترین پیشہ ورانہ معیار کو برقرار رکھتے ہوئے مختلف رکاوٹیں عبور کیں، جن میں دشوار گزار علاقوں میں گشت اور ان پیچیدہ علاقوں میں حالات کا سامنا کرتے ہوئے بہتر حکمت عملی کے ساتھ 48 گھنٹے میں60 کلو میٹر کا فاصلہ بشمول مختلف ٹاسک کو طے کرنا بھی شامل تھا۔ اس سال42 ممالک کی 128 ٹیموں نے مشق میں حصہ لیا۔ ترجمان کے مطابق یہ کامیابی پوری قوم اور پاک فوج کے لیے ایک قابل فخر موقع ہے، پاک فوج اپنی پیشہ ورانہ مہارت اور تربیت کے اعلیٰ معیار کے لیے جانی جاتی ہے، پاک فوج نے ہمیشہ ملک کا پرچم سربلند رکھا ہے۔
