کراچی: آپریشنل مسائل کی بنا پر آج قومی ایئرلائن (پی آئی اے) کی 6 پروازیں منسوخ کر دی گئیں، جبکہ مختلف ایئرپورٹس پر 25 ملکی اور غیر ملکی پروازوں کی آمد و روانگی میں تاخیر ہوئی۔
تفصیلات کے مطابق، پی آئی اے کی لاہور سے کراچی جانے والی پروازیں پی کے 302 اور پی کے 303 منسوخ کر دی گئیں، جبکہ ملتان سے شارجہ جانے والی پرواز پی کے 293 بھی منسوخ کر دی گئی۔
شارجہ سے اسلام آباد کی پی کے 182 اور اسلام آباد سے چترال جانے والی دو پروازیں پی کے 660 اور پی کے 661 کو بھی منسوخ کیا گیا ہے۔
اس کے علاوہ اسلام آباد سے جدہ جانے والی پی آئی اے اور نجی ایئر لائن کی تین پروازوں میں تاخیر ہوئی، جبکہ لاہور سے دبئی جانے والی پرواز پی کے 233 ڈیڑھ گھنٹہ تاخیر سے روانہ ہوگی۔
لاہور سے کراچی جانے والی نجی ایئر لائن کی پرواز ای آر 523 سوا تین گھنٹے تاخیر سے روانہ ہو گی، جبکہ کویت، شارجہ اور القسیم سے اسلام آباد آنے والی پروازوں کی آمد میں بھی ایک سے دو گھنٹے کی تاخیر متوقع ہے۔
