قومی اسمبلی میں اپوزیشن لیڈر عمر ایوب نے وزیر داخلہ محسن نقوی پر شدید تنقید کرتے ہوئے کہا ہے کہ وہ خیبرپختونخوا کے وزیر اعلیٰ علی امین گنڈاپور کو دھمکیاں دے رہے تھے لیکن 24 گھنٹوں کے اندر وہ علی امین کے پیروں میں بیٹھ کر معافیاں مانگنے لگے۔
نجی ٹی وی کے مطابق عمر ایوب کا کہنا تھا کہ پنجاب میں پی ٹی آئی کے ارکان کو زدوکوب کیا جا رہا ہے لیکن وہ تمام ارکان “شیر” کی طرح مضبوطی سے کھڑے ہیں۔
انہوں نے کہا کہ تحریک انصاف کے کارکنان بانی چیئرمین عمران خان کے ساتھ کھڑے ہیں اور محسن نقوی کو خیبر پختونخوا کی ضرورت پڑی تو وہ یہاں آ گئے لیکن ان کو معافی مانگنی پڑی۔
عمر ایوب نے مزید کہا کہ وزیر اعلیٰ خیبرپختونخوا کی گرفتاری کی کوشش کی گئی مگر علی امین نے انہیں معاف کر دیا، البتہ تحریک انصاف محسن نقوی کو معاف نہیں کرے گی۔
ان کا کہنا تھا کہ محسن نقوی نے خیبرپختونخوا کے آئی جی اور چیف سیکریٹری کو براہِ راست احکامات دیے، اس کے نتیجے میں پی ٹی آئی کے رہنما جیل میں ہیں۔
عمر ایوب نے مزید دعویٰ کیا کہ یہی وجہ ہے کہ گزشتہ روز آئی جی سے اختیارات واپس لے لیے گئے ہیں۔
